पार्टी सभापति रवि लामिछानेलाई सरकारले जतिबेला पनि पक्राउ गर्न सक्ने भन्दै राष्ट्रिय स्वतन्त्र पार्टी (रास्वपा) का नेताहरूले विपक्षी दलहरूको बैठकमा गुनासो गरेका छन् । शुक्रबार बिहान बसेको विपक्षी दलहरूको बैठकमाक रास्वपाको नेताहरुले सरकारले लामिछानेलाई पक्राउ गर्न खोजिरहेको चर्चा गरे । बैठकमा रास्वपाका तर्फबाट ६ जना नेताहरु उपस्थित थिए । राजनीतिक पूर्वाग्रह राखेर पार्टी सभापतिलाई पक्राउ गर्न खोजिएको भन्दै गुनासो गरेका बैठकमा सहभागी नेताहरूले बताए ।
बिहीबार टीआरसीबारे छलफल गर्न बालुवाटारमा नेपाली कांग्रेस, एमाले र माओवादी शीर्ष नेताहरूको बैठक बसेको थियो । सो बैठकमा रवि लामिछानेबारे समेत छलफल भएको चर्चा भएको थियो । बैठकपछि पत्रकारहरूसँग कुरा गर्दै रास्वपा नेता विराजभक्त श्रेष्ठले निष्पक्ष अनुसन्धानलाई सघाउन सभापति लामिछाने तयार भए पनि पूर्वाग्रही व्यवहार स्वीकार्य नहुने बताए । उता शुक्रबारको बैठकमा लामिछानेलाई पक्राउ गरेमा प्रतिवाद गर्नेबारे छलफल समेत भएको छ । बैठक आह्वानकर्ता नेकपा माओवादी अध्यक्ष पुष्पकमल दाहाल प्रचण्डले पनि लामिछाने पक्राउ हुन सक्ने संकेत गरेका थिए ।
सहकारीको रकम अपचलनसम्बन्धी छानबिन गर्न बनेको विशेष संसदीय समितिले पूर्वउपप्रधान एवम् गृहमन्त्रीसमेत रहेका राष्ट्रिय स्वतन्त्र पार्टी (रास्वपा) सभापति रवि लामिछानेलाई व्यक्तिगत रूपमा दोषी करार त गरेन तर, विभिन्न सहकारीबाट गोर्खा मिडियामा पैसा ल्याउने सन्दर्भमा उनको संलग्नता रहेको भन्दै आवश्यक अनुसन्धान गर्ने सुझाव दियो । त्यसो त उनको निकटतम् साझेदार छविलाल जोशी पक्राउ परिसकेका छन्, उनी अहिले हिरासतमै छन् । उनले प्रहरीकहाँ ‘‘गोर्खा मिडियामा पैसा ल्याउने मुख्य योजना नै रवि लामिछानेको हो’ भनेर बयान दिएको बताइन्छ । त्यसो त रविलाई पक्राउ गर्ने गाइँगुइँ हल्ला चलेको धेरै भयो ।
यसबाट रास्वपा स्वयम् झस्किँदै आएको छ । रविलाई गत असोज ६ गते नै पक्राउ गर्ने तयारी प्रहरीको थियो तर, अन्तिममा रवि पक्राउ परेनन् । पक्राउ पर्ने खबर पाएपछि रवि रास्वपा मुख्यालय, वनस्थली पुगिसकेका थिए । त्यहाँ उनले काठमाडौंमा उपलब्ध सम्पूर्ण नेता, कार्यकर्ता तथा समर्थक–शुभेच्छुकहरूलाई बोलाएका थिए । लगत्तै रास्वपा मुख्यालयमा सयौं मान्छे जम्मा भए । त्यहाँ समर्थक–शुभेच्छुकबाट रविको पक्षमा नाराबाजीसमेत भयो । यसपछि प्रहरी रित्तो हात फर्कियो । यो विषय दशैंमा सेलाएको थियो तर, दशैं सकिनासाथ उनी पक्राउ पर्ने हल्ला फेरि सुरु भएको छ । शुक्रबार पनि उस्तै हल्ला चल्यो । रवि भने बिहान पूर्वप्रधानमन्त्री एवम् नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले बोलाएको विपक्षी दलहरूको बैठकमा सहभागी थिए । रविलाई बानेश्वरको बैठकलगत्तै पक्राउ गर्ने भनिएको बताइन्छ !
तर, त्यसो भएन । प्रहरीको उच्च स्रोतका अनुसार उनलाई प्रचण्डकै आग्रहअनुरूप पक्राउ नगरिएको हो । जसै, रवि अहिले प्रचण्डका सारथि हुन् । प्रमुख प्रतिपक्षको भूमिकामा संसद्मा उपस्थित माओवादी केन्द्रका अध्यक्ष प्रचण्डलाई चौथो ठूलो दल रास्वपाका सभापति सारथि नहुने कुरै भएन । यही कारण प्रचण्ड रविलाई पक्राउ ग¥याइहाल्ने मुडमा छैनन् । तर, रविविरुद्ध अहिलेसम्म पक्राउ पुर्जी भने जारी नभएको बताइएको छ ।
