काठमाडौं– पूर्वराजा ज्ञानेन्द्र शाहले भूटान भ्रमणमा आफूलाई गरेको सम्मानलाई सबै नेपालीहरुलाई गरेको सम्मानका रुपमा ग्रहण गरेको बताएका छन् । निर्मल निवासमा शनिवार सर्वसाधारणलाई विजया दशमीको टिका लगाउने क्रममा सञ्चारकर्मीहरुसँग संक्षिप्त प्रतिक्रिया दिँदै पूर्वराजा शाहले यस्तो बताएका हुन् । केही दिनअघि मात्रै आफू भूटान गएको र भूटान भ्रमण निजी भ्रमण रहेको शाहले बताए । भूटान भ्रमणको बारेमा सबैको चासो र जिज्ञासा रहेको पनि उनले जिकिर गरे । 

पूर्वराजा शाहले भूटानको राजपरिवार र भूटानी जनताले आफूलाई दर्शाएको स्वागत, सम्मान र मित्रतालाई आफूले सम्पूर्ण नेपालीहरु र नेपाललाई गरेको सम्मानका रुपमा लिएको बताए । नेपाललाई गरेको स्वागतका लागि भूटानी जनता र राजपरिवारलाई उनले कृतज्ञता पनि व्यक्त गरे । पूर्वराजा शाहले विजया दशमीको अवसरमा सम्पूर्ण नेपालीलाई शुभकामना व्यक्त गरेका छन् ।