काठमाडौं । मध्यपहाडी लोकमार्गमा गुडिरहेको गाडी सुनकोशी नदीमा खस्दा तीन जना बेपत्ता भएका छन् । शनिबार बेलुका खोटाङबाट भक्तपुरका लागि छुटेको नम्बर खुल्न नसकेको इसुजु हाइलेक्स गाडी सिन्धुलीको गोलन्जोर गाउँपालिका–१ कुडुलेमा अनियन्त्रित भएर नदीमा खसेको प्रहरीले जनाएको छ । 

जिल्ला प्रहरी कार्यालय सिन्धुलीका प्रमुख प्रहरी उपरीक्षक गोविन्दराज काफ्लेकाअनुसार गाडी खस्दा चालक भक्तपुरको सूर्यविनायक नगरपालिकाका ३२ वर्षीय अबिन बके, ३० वर्षीय प्रनित स्यागु र ३७ वर्षीय बलराम घटुवा बेपत्ता भएका छन् । 

अर्का एक जना सुशान्त कक्षपति घाइते भएका छन् । उनको स्थानीय शुभजीवन अस्पताल खुर्कोटमा उपचार भइरहेको छ । घटनास्थलमा खोजीका लागि सशस्त्र प्रहरी बल नेपाल विपद व्यवस्थापन बेस खुर्कोटबाट गोताखोरसहित प्रहरी टोली खटिएको छ । रातिका समयमा उद्दारमा कठिनाइ भएकाले आज बिहानैबाट गोताखोरले खोजी सुरू गरेको प्रहरीले जनाएको छ ।