काठमाडौं । उपप्रधान तथा गृहमन्त्री रवि लामिछाने मन्त्रालयको जिम्मेवारीमा आएपछि केही उदाहारणीय कार्य गर्ने छाँटकाँट देखाइरहेका छन् ।
यही नयाँ वर्षको अवसरमा उनले काठमाडौंको प्रमुखकै पर्यटकीय क्षेत्र ठमेल र दरबार मार्गलाई २४सै घण्टा खुल्ला राख्ने निर्णय पनि गरिसकेका छन् ।
जस अनुसार बैशाख १ गते अर्थात शनिबारबाटै ठमेल र दरबार मार्ग औपचारिक रुपमा २४सै घण्टा खुल्ला भएको छ ।
गृहमन्त्री रविले काठमाडौं शहरलाई चलायमान र क्रियाशिल बनाउन दरबार मार्ग र ठमेल क्षेत्र सञ्चालन गरिएको दावी गर्दै आएका छन् ।
काठमाडौं जिउँदो र जाग्दो शहर बनाउन आफूले उक्त निर्णय गरेको बताइरहेका छन् । गृहमन्त्रालयले यसको सुरक्षाको जिम्मा जल्ला प्रशासन कार्यालय काठमाडौँलाई दिएको छ ।
यसका अलावा गृहमन्त्री रविले आचारसंहिताअनुरुप मापदण्ड नपुगेका व्यवसायलाई वैशाख २ गतेदेखि बन्द गर्ने निर्णय गरेका छन्।
त्यस्तै, गृहमन्त्री रविकै पहलमा शनिवारदेखि लागु हुने गरी काठमाडौँको माइतीघरदेखि बानेश्वरसम्म कायम निषेधित क्षेत्र हटाइएको छ ।
रविको निर्देशन लागु गर्न काठमाडौं जिल्ला प्रशासनले सुरक्षा चुनौती विश्लेषण समेतका आधारमा माइतीघर मण्डलादेखि बानेश्वर कृष्ण टावरसम्मको क्षेत्रलाई निषेध आदेश कायम नरहेको भन्दै सूचना जारी गरिसकेको छ ।
यसअघि काठमाडौँका माइतिघरसहित विभिन्न २२ स्थानमा कुनैपनि प्रदर्शन तथा भेला गर्न मनाही गरिएको थियो । तर, अझैपनि प्रदर्शन र जुलुसको कार्यक्रमहरु गर्दा सार्वजनिक सम्पत्ति तोडफोड गर्न पाइने छैन ।
यसैगरी प्रदर्शनका क्रममा सुरक्षाकर्मीमाथि आक्रमण गर्न पनि पाइने छैन । यदी यस्ता गतिविधि भए वा सार्वजनिक सम्पतिको क्षति भएमा सम्बन्धित आन्दोलन गर्ने समूह तथा संगठनले नै त्यसको भरपाई गर्नु पर्ने नियम लागु गरिएको छ ।
२४सै घण्टा बजार खुल्ला राख्ने र निषेधाज्ञा हटाउन रविले दिएको निर्देशनले आर्थिक गतिविधि चलायमान पर्ने र जनताको अभिव्यक्ति स्वतन्त्रतालाई भने प्रत्यभूत गरेको छ । यसले व्यावसाय तथा रोजगारसमेत बढाउन समेत टेवा पुर्याउने देखिन्छ ।
तर, गृहमन्त्री रवि लामिछाने नयाँ वर्षकै अवसरमा शनिबार थापाथलीस्थित सडकमा नेपाल प्रहरी, ट्राफिक प्रहरी र सर्वसाधारणसँग खुशीयाली साटासाट गर्न पुगेको विषयलाई लिएर भने केही केही पक्षले भने अलोचना गरिरहेको देखिन्छ । उनले प्रहरीहरु सँगसँगै सर्वसाधारणलाई ट्रफिक सचेतना दिँदै र सडकमै चक्लेट बाँडेका थिए ।
प्रचारबाजी र सस्तो लोकप्रियताका लागि उक्त हर्कत गरेको रविको उक्त व्यवहारप्रति आलोचना भइरहेको हो ।
त्यस्तैगरी आइतबार विहानै गृहमन्त्री रवि लामिछानेले आफ्नै नेतृत्वमा ट्राफिक जनचेतना ¥याली निकालेका छन् ।
यसप्रति पनि केही पक्षले विरोध जनाएका छन् । गृहमन्त्री नेतृत्वको ट्रफिक सचेतना र्याली आइतबार विहानै सुन्धाराबाट सुरु भएर रत्नपार्क, पुरानो बसपार्क हुँदै सभागृह पुगेको थियो ।
ट्राफिक नियमबारे जनचेतना फैल्याउन काठमाडौँ उपत्यका ट्राफिक प्रहरी कार्यालयको आयोजनामा उक्त कार्यक्रम भएको थियो । तर गृहमन्त्री रविले नै ट्राफिक व्यवस्थापनमा आँच पुर्याउने गरी ¥याली गरेको तथा सस्तो लोकप्रियताका लागि प्रचारात्मक गतिविधि गरेको भन्दै सर्वसाधारण तहबाटै आलोचना भइरहेको छ ।
रविकै नेतृत्वमा आइतबार भएको ट्राफिक सचेतना कार्यक्रममा विद्यार्थी तथा सामाजिक अभियन्ताहरु समेत सामेल थिए । गृहमन्त्री रविले सुरक्षा क्षेत्रमा चुस्तता र अन्य व्यवस्थापकीय क्षेत्रहरुमा सकारात्मक कार्य गरिरहेपनि उनको व्यवहार र कार्यशैलीको भने व्यापक आलोचना भइरहेको हो ।
यसअघि पनि रविले समस्या समाधानको माग गर्दै गृहमन्त्रालय आएका सहकारी पीडितहरुलाई चक्लेट बाडेकका थिए ।
यही विषयलाई लिएर उनले त्यो बेला पनि आलोचना खेप्नु परेको थियो । यतिबेला गृहमन्त्री रविलाई नै सहकारी ठगी प्रकरणमा संलग्न भएको आरोप लगाउँदै प्रमुख प्रतिपक्षी दल नेपाली काँग्रेसले संसदमा राजीनामा माग गरिरहेको छ । यद्यपि रविले यस विषयमा आफू निर्दोष रहेको दावी गर्दै आइरहेका छन् ।
