काठमाडौं । पछिल्लो समय राजनीतिक र मुलुकका विभिन्न तह तप्कामा युवा नेतृत्व हावी हुने क्रम बढिरहेको छ । यसको पुष्टि गर्ने  आधारहरु पछिल्ला निर्वाचनहरुको नतिजाहरु समेत हुन् । नागरिक र मतदाताहरुलेसमेत नेतृत्वमा युवा पुस्ताको तीव्र खोजि गरिरहेका छन् ।  

विगतका निर्वाचनमा जनता सक्षम र युवा नेतृत्वको खोजी भन्दा अग्रजप्रतिको सम्मानका लागि मत पोख्ने गर्दथे । तर आजको समाज युवामैत्री नेतृत्वतर्फ अग्रसर भइरहेको छ । 

आमनागरिकको यो मनोविज्ञानलाई दल र तिनका नेतृत्वले पनि बुझ्नु पर्ने आवश्यकता बढ्दै गएको छ । संसदको दोस्रो ठूलो दल नेकपा एमालेले भने यही मनोविज्ञानलाई आत्मसाथ गर्दै आगामी उपनिर्वाचनका लागि युवा उम्मेदवारलाई प्राथमिकता दिएको छ । 

बैशाख १५ मा प्रतिनिधिसभापतर्फ हुने एक मात्रै उपनिर्वाचन इलाम – २ को उम्मेदवारका लागि एमालेले सुहाङ नेम्वाङलाई छनौट गरेको छ ।  

यस क्षेत्रमा उम्मेदवार बन्न एमाले भित्र आकांक्षीहरुको लस्कर थियो । यहाँ सुहाङसहित रविन्द्र सुवेदी, नरेन्द्र भट्टराई, देवी क्षेत्री दुलाल, बुद्धि खनाल र रिप्पल राईले टिकटको आकांक्षा राखेका थिए । 

उम्मेदवारी दावी गर्ने नेम्वाङ बाहेकका यी पात्रहरु लामो समयदेखि सक्रिय राजनीतिमा रहेर पार्टीलाई ठूलै योगदान गर्नेहरुमै पर्छन् । 

यसका  अलावा नेकपा एकीकृत समाजवादीका सम्मानीत नेता झलनाथ खनालसमेत आफूलाई टिकट दिए एमाले नै प्रवेश गर्ने मनशासय व्यक्त गरिरहेका थिए । जबकी झलनाथ एमाले त्यागेर नेकपा एकीकृत समाजवादी खोल्न अग्रसरमध्ये एक प्रमुख पात्र हुन् । 

झलनाथ कुनै बेला एमालेकै नेतृत्व गर्दै मुलुकको प्रधानमन्त्री पनि बनेका थिए । तर उनै झलनाथ र पार्टीलाई ठूलै योगदान गरेका अन्य नेताहरुलाईसमेत अध्यक्ष ओलीले बाइपास गर्दै सुहाङलाई टिकट दिलाए । यसको अर्थ पुराना नेताहरुलाई उपनिर्वाचनमा उम्मेदवार नबनाउने ओलीको रणनीति हो । 

सुहाङलार्ई उम्मेदवार बनाउने निर्णय लगत्तै अध्यक्ष केपी शर्मा ओलीले सामाजिक संजालमा युवा नेतृत्वलाई प्रोत्साहन र स्थान दिनुपर्ने आशायको स्टाटससमेत लेखे । 

ओलीले सुहाङलाई ३२ वर्षीय युवा उपनिर्वाचनमा उम्मेदवार बनेको उल्लेख गरेका छन् । साथै उनले सुहाङलाई नयाँ जोश, केही गर्ने हुटहुटी र ऊर्जा भएको पात्रका रुपमा चर्चा गरेका छन् । 

आँफै ७० वर्ष माथि उमेर भएर पनि पार्टीको नेतृत्वमा रहेका अध्यक्ष ओली पछिल्लो समय मुलुकको बदलिँदो चाखलाई सिरोपण गर्ने प्रयत्न गरिरहेका छन् । विशेषगरी जनताको प्रत्यक्ष प्रतिनिधित्व हुने संयन्त्रहरुमा उनले युवालाई महत्व दिइरहेका छन् । 

एमाले भर्खरै सरकारमा पनि सामेल भएको छ । जसमा ओलीले नयाँ र युवाको प्रतिनिधित्व हुनेगरी मन्त्रीहरु पठाएका छन् । प्रतिनिधिसभाको प्रमुख सचेतक र सचेतकमा पनि ओलीले एमाले युवा पुस्तालाई प्राथमिकता दिएका छन् । यसअघि पदम गिरी प्रमुख सचेतक रहेकोमा उनलाई सरकारमा पठाइएको छ ।

यसपछि रिक्त प्रमुख सचेतकमा पदमा ओलीले महेश वर्तौलालाई ल्याए । त्यस्तै सचेतकमा सुनिता बराललाई नियक्त गरे । यसरी ओलीले पछिल्ला दिनमा एमालेको विभिन्न संयन्त्रहरुमा युवा पुस्तालाई प्राथमिकता  दिइरहेको देखिन्छ ।  

हुन  त  पार्टीको मुख्य नेतृत्वमा रहेका ओलीपनि उमेरको हिसाबले उत्तरार्धमै छन । तर उनी उमेरकै कारण आफूलाई आलोचना गर्नेहरुलाई राजनीतिक सक्रियताबाट जवाफ दिने गर्छन । 

ओली केही महिना अघि पार्टीले आयोजना गरेको पहाडी राजमार्ग लक्षित अभियानमा आँफै सशक्तरुपमा खटे । उनले युवा नेताहरुभन्दा आफू पनि कुनै कोणबाट कमजोर नरहेको पुष्टि गर्ने प्रयास गरे । त्यसयताका पार्टीका हरेक नियुक्ति र प्रतिनिधित्वलाई ओलीले युवामैत्री बनाउन खोजेका छन् । 

मुलुक र वर्तमान राजनीतिक परिस्थितिले पनि हाल युवा पुस्ताको नेतृत्व र प्रतिनिधित्व खोजिरहेको छ । यसअर्थमा ओलीका यी निर्णयहरु ज्यादै सकारात्मक छन् । तर विभिन्न आलोचना र टिप्पणीकाबीच ओली एमालेको दशौँ महाधिवेशन मार्फत दोस्रो कार्यकालका लागि अध्यक्ष बनेका थिए । यद्यपि मतदाता र कार्यकर्ताकै मनोविज्ञानलाई बुझ्दै आलीले अहिले केही स्थानमा युवा पुस्तालाई समेट्ने प्रयास थालेका छन् । 

ओलीले निकट भष्यिमै पार्टी नेतृत्व पनि त्याग गर्दै नयाँलाई सुम्पिन सके मुलुक र जनताप्रति साँचिकै सकारात्मक सन्देश जान सक्थ्यो की ? एमाले अध्यक्ष ओलीले यसतर्फ पनि ध्यान दिऊन् ।