काठमाडौं । खासगरी नयाँ सत्ता समीकरणपछि काँग्रेस र रास्वपाको दुस्मनी बढेको छ । यही विषयलाई कतिपयले काँग्रेस सत्ताबाट बहिरगमित भएपछि रास्वपा सभापतिसमेत रहेका गृहमन्त्री रविमाथि निराधार आरोप लगाउन पुगेको तर्क गरिरहेका छन् । 

हुन पनि संसदमा बोल्ने हरेक काँग्रेस सांसदहरुले प्रत्येक बैठकको शुन्य समय होस वा समय लिएरै बोल्दा गृहमन्त्री रविलाई सहकारी ठगी प्रकरणको विषयसँग जोडेर राजीनामा माग गरिररहेका छन् ।

यही प्रकरणलाई लिएर काँग्रेसले एक दिन त संसद नै अवरोध गरेको थियो । उक्त विषय प्रमुख प्रतिपक्षी दलले नै गम्भीर रुपमा उठाएको भन्दै प्रधानमन्त्री प्रचण्डले समेत संसदको रोष्टममै उभिएर रविबारे प्रष्टिकरण दिए । तर काँग्रेसले रविमाथि आक्षेप लगाउन  छाडेन । 

बरु उसले छानविन समिति नै बनाउनु पर्ने सशक्त आवाज उठाउँदै आएको छ । बचतकर्ताहरुले सहकारीमा जम्मा गरेको रकम रविले अपचलन गरेको प्रमाण आफूहरुसँग रहेको भन्दै काँग्रेसले संसदमा पटक पटक ठोकुवा गर्योे । 

यस विषयमा रविले आफू सहकारी ठगी प्रकरणमा कुनै पनि तवरले संलग्न नरहेको प्रतिजवाफ दिँदै आएका छन् । 

बुधबार काठमाडौंमा आयोजित पत्रकार सम्मेलनमा रविले सहकारीको सम्बन्धमा आफूमाथि लागेको जस्तोसुकै प्रमाण र आरोपमाथि छलफल गर्न तयार रहेको जवाफ दिए । 

गृहमन्त्री रविले उजुरी नै नपरेको विषयमा आफूलाई काँग्रेसले खेदो खनेको आरोप लगाए । आफ्नो राजीनामा माग्ने सांसदहरु पनि हिजो मन्त्री रहँदैखेरी अख्तियारलाई वयान दिनेहरु भएको भन्दै उनीहरुको यो चरित्र असोभनिय र अनौतिक भएको रविको दावी छ ।

महामन्त्री गगन थापा लक्षित जवाफ दिँदै रविले ठाउँ र मिति तोकेरै आफूमाथि लगाइएको आरोपको सम्बन्धमा तार्किक भिडन्त गर्न सक्ने पनि चेतावनी दिए । सदनमा र समितिर्मा  बोल्न नदिइएको भन्दै रविले आफू काँग्रेससँग जही भन्यो त्यही भिड्न तयार रहेको उद्घोष गरे । 

व्याङ्ग्यात्मक टिप्पणीसमेत गरेका रविले  काठमाडौं– ४ अर्थात गगन थापाकै निर्वाचिन क्षेत्रका जनतालाई साक्षि राखेर खुल्ला बहसमा आउन काँग्रेसलाई चुनौति दिए । आफूमाथि पटक पटक निराधार आरोप लगाएर जबरजस्ती अपराधि करार गर्न खोजिएको रविको ठम्याइ छ ।

अनियमितता र भ्रष्टाचारीविरुद्ध वर्तमान सरकार निर्मम बन्ने दावी गर्दै रविले सबै काण्डका आरोपीहरु ढिलो चाँडो अनुसन्धानको घेरामा आउने दावी गरे । तर अहिले इंगित भइरहेका ठूला–ठूला काण्डाका आरोपीहरु पक्राउ परेको हेर्न केही समय पर्खन आम नागरिकलाई आग्रह गरे ।  

सुन तस्करी प्रकरणमा पक्राउ परेका माओवादी केन्द्रका उपाध्यक्ष कृष्ण बहादुर महराको प्रशंगमा रविले उनलाई अस्वस्थताका कारण हाजिरी जमानीमा छोडिएको प्रष्ट पारे । महरामाथि अनुसन्धान कायमै रहेकाले अपराधिलाई मिलेमत्ता गरेर छोडिएको भनेर नबुझ्न रविको आग्रह छ ।

यसरी गृहमन्त्री रविले आफूमाथि लागेको आरोप पुष्टि गर्न काँग्रेसलाई चुनौति दिँदै कुनै पनि भ्रष्ट्राचार र त्यसमा संलग्नलाई नछोड्ने चेतावनी दिइरहेका छन् । तर प्रमुख प्रतिपक्षी दल नेपाली काँग्रेसले भने गृहमन्त्री बने लगत्तैबाट रवि सहकारी ठगीमा  संलगन भएको भन्दै संसद र सडकबाटै उनको राजीनामा माग गरिरहेको छ । रविविरुद्धका प्रमाणहरु प्रशस्त रहेको भन्दै काँग्रेस संसदमा कुर्लिरहेको छ  । 

यही प्रकरणले पछिल्लो समय रवि र काँग्रेसबीच  ठूलै दुस्मनी बढेको प्रष्ट देखिन्छ । काँग्रेसले रविलाई सहकारी प्रकरणमा गम्भीर आरोप लगाइरहे पनि ऊ सँग कस्तो प्रमाण छ, त्यो खुलेको छैन । 

यता रविले पनि आफू  निर्दोष रहेको भन्दै बहसका लागि चर्को चुनौति दिइरहेका छन् । रविले यस्तो चुनौति दिइरहँदा अब काँग्रेसले कस्तो  प्रतिक्रिया जनाउछ, यो जिज्ञासाको विषय बनेको छ ।